Oʻzbekistonda bolalar qashshoqligi besh yilda deyarli toʻrt barobar kamaydi

Prezident Shavkat Mirziyoyev soʻnggi besh yil ichida Oʻzbekistonda bolalar qashshoqligi deyarli toʻrt barobar qisqarganini, maktabgacha taʼlimga qamrov esa 27,7 foizdan 78 foizga oshganini aytdi. U bu fikrlarni 21 oktyabrda Samarqandda ochilgan Kelajak va bolalar farovonligi boʻyicha Jahon sammiti ishtirokchilariga murojaatida bildirdi.

Davlat rahbari bolaning farovonligini faqat uning kelajakdagi yutuqlari yoki daromadi nuqtayi nazaridan baholab boʻlmasligini taʼkidladi. Har bir bola hozirdanoq gʻamxoʻrlik, xavfsizlik, sifatli taʼlim va tibbiy yordamga haqli. «Bolaning qadri kelajakda qanday kasbni tanlashi yoki qancha daromad keltirishi bilan oʻlchanmaydi», dedi Mirziyoyev.

Prezidentning aytishicha, tugʻish vaqtidagi ona oʻlimi va rivojlanishda kechikish bor bolalar soni ikki barobar kamaygan. Olti yoshli bolalarning deyarli 100 foizi maktabga tayyorlov bilan qamrab olingan, oliy taʼlimga kirish imkoniyati esa 9 foizdan 45 foizga oshgan. Soʻnggi ikki yilda inklyuziv maktablar soni besh barobar koʻpaygan va nogiron bolalarning 85 foizdan ortigʻi taʼlim xizmatlari bilan qamrab olingan.