Işlemäge Russiýa giden 12 gazagystanly urşa düşüp, watanyna dolandy

Russiýa işlemäge gidip, Ukrainadaky urşa çekilen 12 Gazagystan raýaty öz ýurduna dolandy. Advokat Meýrman Şekeýewiň habar bermegine görä, bu adamlar harby borçnamalardan boşadyldy we olaryň ýurda dolanmagyna päsgel berýän kanuny ýagdaýlar aradan aýryldy. Şekeýew oňat netijäniň Gazagystanyň döwlet edaralarynyň goldawy bilen gazanylandygyny belläp geçdi.

Şekeýew Instagramdaky paýlaşygynda şeýle ýazdy: «Bu diňe öýe dolanmak däl. Onuň arkasynda ene-atalaryň gözýaşlary, maşgalalaryň umytlary we Gazagystan raýatlarynyň öz watanyna dolanmagy bar. Bu ýigitleriň her biriniň şu gün öz topragynda, öz ýurdunda, ene-atasynyň golaýynda bolmagy üçin tagalla eden hemmelere uly minnetdarlyk!»

Bir gün öň Şekeýew 13 gazagystanlynyň Ukrainadaky söweş zonasyndan azat edilmäge taýynlanýandygyny we Daşary işler ministrligi arkaly Russiýa diplomatik nota iberilendigini aýdypdy. Daşary işler ministriniň orunbasary Erjan Aşikbaýew Russiýa bilen Ukrainanyň arasyndaky harby esirleriň çalşygynyň we goşa raýatlyk ýagdaýlarynyň bu prosesi kynlaşdyrýandygyny belleýärdi. Urşuň başlanandan bäri Merkezi Aziýanyň takmynan 30 raýatynyň esir alnandygy habar berilýär.