Çagalaryň abadanlygyna maýa goýmak barada Samarkant deklarasiýasy kabul edildi

Samarkantda geçirilen «Çagalaryň abadanlygyna maýa goýmak» atly bütindünýä sammiti öz işini tamamlady. Forumyň ýapylyş dabarasynda Özbegistanyň Prezidentiniň ýanyndaky Milli sosial goraw agentliginiň birinji orunbasary Şahnoza Mirziýoýewa Samarkant deklarasiýasynyň kabul edilendigini yglan etdi.

Resminamada çagalaryň dünýä ilatynyň üçden birini düzýändigi, şeýle hem krizisleriň çagalara has agyr täsir edýändigi bellenýär. Deklarasiýa sekiz borçnamany öz içine alýar: sosial goraw, zorlukdan goramak, onlaýn howpsuzlyk, ilkinji ýyllar we bilim, saglygy goraw, çaga kesellerine garşy göreş, maşgalalara goldaw we ýaşlary taýýarlamak.

ÝUNISEF-iň sebitleýin direktory Edwar Begbeder we Bütindünýä bankynyň Merkezi Aziýa boýunça direktory Naji Benhassin çykyş etdiler. Benhassin Samarkandy we Özbegistany bu ýaly deklarasiýa üçin amatly ýer diýip belledi. Sammitde esasy problema hökmünde wadalar bilen olaryň ýerine ýetirilişiniň arasyndaky tapawut görkezildi.