İşləməyə Rusiyaya gedib müharibəyə düşən 12 qazaxıstanlı vətənə qayıdıb

Rusiyaya işləmək üçün gedib Ukraynadakı müharibəyə cəlb olunan 12 Qazaxıstan vətəndaşı evə qayıdıb. Vəkil Meyrman Şekeyevin bildirdiyinə görə, bu şəxslər hərbi öhdəliklərdən azad edilib və geri dönmələri üçün hüquqi maneələr aradan qaldırılıb. Şekeyev müsbət nəticənin Qazaxıstan dövlət orqanlarının köməyi ilə əldə edildiyini qeyd edib.

Şekeyev Instagram-dakı yazısında belə yazıb: «Bu, sadəcə evə qayıtmaq deyil. Bunun arxasında valideynlərin göz yaşları, ailələrin ümidləri və Qazaxıstan vətəndaşlarının doğma torpağa qayıdışı dayanır. Bu gənclərin hər birinin bu gün öz torpağında, öz ölkəsində, valideynlərinin yanında olması üçün səy göstərən hamıya böyük təşəkkür!»

Bir gün əvvəl Şekeyev 13 qazaxıstanlının Ukraynadakı döyüş zonasından azad edilməsinə hazırlaşdığını və Xarici İşlər Nazirliyi vasitəsilə Rusiyaya diplomatik nota göndərildiyini bildirmişdi. Xarici işlər nazirinin müavini Yerjan Aşıkbayev isə Rusiya ilə Ukrayna arasında hərbi əsir mübadilələrinin və ikili vətəndaşlıq hallarının bu prosesi çətinləşdirdiyini demişdi. Müharibənin başlanmasından bəri təxminən 30 Mərkəzi Asiya vətəndaşının əsir düşdüyü bildirilir.