Ishlash uchun Rossiyaga borib urushga tushib qolgan 12 qozogʻistonlik vatanga qaytdi

Rossiyaga ishlash uchun ketib, Ukrainadagi urushga jalb etilgan 12 nafar Qozogʻiston fuqarosi uyiga qaytdi. Advokat Meyrman Shekeyevning xabar berishicha, ular harbiy majburiyatlardan ozod etilgan va ularning vatanga qaytishiga boʻlgan huquqiy toʻsiqlar bartaraf etilgan. Shekeyev ijobiy natijaga Qozogʻiston davlat organlarining koʻmagi bilan erishilganini qayd etdi.

Shekeyev Instagramdagi xabarida shunday yozdi: «Bu shunchaki uyga qaytish emas. Ortida ota-onalarning koʻz yoshlari, oilalarning umidlari va Qozogʻiston fuqarolarining vatanga qaytishi turibdi. Bu yigitlarning har biri bugun oʻz yerida, oʻz mamlakatida, ota-onasi yonida boʻlishi uchun harakat qilgan barchaga katta rahmat!»

Bir kun avval Shekeyev 13 nafar qozogʻistonlik fuqaroni Ukrainadagi jang zonasidan ozod qilishga tayyorlanayotganini va Tashqi ishlar vazirligi orqali Rossiyaga diplomatik nota yuborilganini aytgan edi. Tashqi ishlar vazirining oʻrinbosari Yerjan Ashikbayev esa Rossiya va Ukraina oʻrtasidagi harbiy asirlar almashinuvi hamda qoʻshaloq fuqarolik holatlari bunday qaytarishni murakkablashtirayotganini bildirgan. Urush boshlanganidan beri Markaziy Osiyoning taxminan 30 nafar fuqarosi asirga tushgani xabar qilinmoqda.