EABR Merkezi Aziýa üçin gönüden-göni maýa goýum gaznasyny döredýär

Ýewraziýa ösüş banky (EABR) hyzmatdaşlary bilen bilelikde Merkezi Aziýa we Zakawkaziýa ýurtlaryndaky umytly kompaniýalara maýa goýjak täze gönüden-göni maýa goýum gaznasyny döreder. Bankyň matbugat gullugynyň habaryna görä, Merkezi Aziýa we Zakawkaziýa gönüden-göni maýa goýum gaznasy (CACPEF) Hytaý maýa goýum korporasiýasy, Omanyň maýa goýum edarasy, Özbegistanyň dikeldiş we ösüş gaznasy, türk OYAK gaznasy, EABR we Shenwan Hongyuan Securities gatnaşygynda döredilýär.

Gaznada Hytaýdan, Ýakyn Gündogardan we Merkezi Aziýadan gelen institusional maýadarlaryň kapitaly, tejribesi we işewür baglanyşyklary birleşdiriler, sebitiň kompaniýalaryna hyzmatdaşlaryň pudak ekspertizasyna, tehnologiýalaryna we bazar serişdelerine girmekde kömek eder. EABR dolandyryş geňeşiniň başlygynyň orunbasary Daniýar Imangaliýew sebitiň kompaniýalarynyň işini giňeltmek we täze bazarlara çykmak üçin uzak möhletli kapitala mätäç bolduklaryny belleýär.

Şeýle hem, 23-nji oktýabr, anna güni Özbegistanyň Prezidenti Şawkat Mirziýoýew ABŞ-nyň Eldridge Industries maýa goýum holding kompaniýasynyň ýolbaşçysy Todd Boehly bilen iri taslamalary maslahatlaşdy. Hyzmatdaşlygyň ileri tutulýan ugurlary magdan senagaty, metallurgiýa, gurluşyk we şäher infrastrukturasyna sanly çözgütleri ornaşdyrmak diýlip kesgitlendi.