ЕАБР Орталық Азия мен Закавказьеге арналған тікелей инвестициялар қорын құрмақ

Еуразиялық даму банкі (ЕАБР) серіктестерімен бірлесе отырып, Орталық Азия мен Закавказье елдеріне арналған жаңа тікелей инвестициялар қорын құрмақ. Қор өңірдегі перспективалы компанияларға инвестиция салады. Банк баспасөз қызметінің хабарлауынша, Орталық Азия және Закавказье тікелей инвестициялар қоры (CACPEF) Қытай инвестициялық корпорациясы, Оман инвестициялық басқармасы, Өзбекстанның қайта құру және даму қоры, түрік OYAK қоры, ЕАБР және Shenwan Hongyuan Securities қатысуымен құрылып жатыр.

Қор институционалдық инвесторлардың капиталын, тәжірибесін және іскерлік байланыстарын біріктіріп, өңір компанияларына серіктестердің салалық сараптамасына, технологияларына және нарықтық ресурстарына қол жеткізуге көмектеседі. ЕАБР басқарма төрағасының орынбасары Данияр Имангалиев Орталық Азия мен Закавказье компаниялары бизнесті кеңейту және жаңа нарыққа шығу үшін ұзақ мерзімді капиталға мұқтаж екенін атап өтті.

Ал 23 қазанда, жұма күні Өзбекстан президенті Шавкат Мирзиёев американдық Eldridge Industries инвестициялық холдингі компаниясының басшысы Тодд Боэлимен ірі жобаларды талқылады. Ынтымақтастықтың басым бағыттары ретінде тау-кен өнеркәсібі, металлургия, құрылыс және қала инфрақұрылымына цифрлық шешімдерді енгізу анықталды.