Rosatom: Özbegistandaky AES-de 2027-nji ýylda giň göwrümli gurluşyk işleri başlanar

Rosatom döwlet korporasiýasynyň baş direktory Aleksey Lihaçew, Özbegistanda gurulýan ilkinji integrirlenen atom elektrik stansiýasynyň gurluşyk meýdançasynda 2027-nji ýylda giň göwrümli gurluşyk işleriniň başlanjakdygyny aýtdy. Lihaçew 23-nji oktýabrda žurnalistlere beren beýanatynda meýdançadaky işgärleriň sanyny häzirki 1 müň adamdan iň ýokary nokatda 12-13 müň adama çenli ýokarlandyrmak meýilleşdirilýändigini belledi.

Onuň sözlerine görä, indiki ýyl uly stansiýanyň gözleg işleri we proýektirleme tamamlanar. Şu ýyl bolsa iki kiçi energiýa blokunyň reaktor bölümleriniň binýat plitalarynyň betonlanmagyny tamamlamak we dolandyryş binasyny, reaktor we maşyn zallaryny gurmaga başlamak göz öňünde tutulýar.

Lihaçew proýektde ýerli podratçylaryň işjeň gatnaşýandygyny belledi. Rosatomyň baha bermegine görä, lokalizasiýa derejesi 40 göterime ýetip biler. Onuň sözlerine görä, bu proýektiň ykdysady netijeliligini ýokarlandyrar we korporasiýanyň beýleki ýurtlardaky obýektleriniň gurluşygynda işläp biljek hünärmenleri taýýarlamaga mümkinçilik berer. Häzirki wagtda takmynan 350 adam Taşkentdäki MEPhI filialynda, takmynan 900 adam bolsa Russiýanyň uniwersitetlerinde okaýar.