Росатом: Өзбекстандагы АЭСтин курулушунда 2027-жылы чоң масштабдуу иштер башталат

«Росатом» мамлекеттик корпорациясынын башкы директору Алексей Лихачёв Өзбекстандагы биринчи интеграцияланган атом электр станциясунун курулуш аянтчасында 2027-жылы чоң масштабдуу курулуш иштеринин башталарын билдирди. Ал 23-октябрда журналисттерге берген маалыматында аянтчадагы кызматкерлердин санын учурдагы 1 миң адамдан чокуда 12–13 миң адамга чейин көбөйтүү пландалып жатканын айтты.

Анын сөзүнчө, келерки жылы чоң станциянын издөө иштери жана долбоорлоо аяктайт. Быйыл эки кичинекей энергоблоктун реактор бөлүмдөрүнүн негизги плиталарын бетондоону аяктап, башкаруу имаратын, реактор менен машина залдарын куруу башталат.

Лихачёв долбоорго жергиликтүү мердигерлердин активдүү катышып жатканын белгиледи. «Росатом»дун баалоосу боюнча, компетенцияларды жергиликтүү деңгээлде өздөштүрүү 40 пайызга жетиши мүмкүн. Анын айтымында, бул долбоордун экономикалык натыйжалуулугун жогорулатып, корпорациянын башка өлкөлөрдөгү объекттерин курууга катыша ала турган адистерди даярдоого мүмкүнчүлүк берет. Азыр болжол менен 350 киши Ташкенттеги МИФИнин филиалында, болжол менен 900 киши Россиянын жогорку окуу жайларында окуп жатат.