Rosatom: Özbəkistandakı AES-də 2027-ci ildə geniş miqyaslı tikinti işləri başlayacaq

Rosatom Dövlət Korporasiyasının baş direktoru Aleksey Lixaçov, Özbəkistanda tikiləcək ilk inteqrasiyalı atom elektrik stansiyasının tikinti meydançasında 2027-ci ildə geniş miqyaslı tikinti işlərinin başlayacağını bildirib. Lixaçov 23 oktyabrda jurnalistlərə verdiyi açıqlamada meydançada işçi heyətinin sayının hazırkı 1 min nəfərdən zirvədə 12-13 min nəfərə çatdırılmasının planlaşdırıldığını deyib.

O, gələn il böyük stansiyanın axtarış işlərinin və layihələndirmənin tamamlanacağını söyləyib. Bu il isə iki kiçik enerji blokunun reaktor bölmələrinin təməl plitələrinin betonlanmasının başa çatdırılması və idarəetmə binasının, reaktor və maşın zallarının tikintisinə başlanılması nəzərdə tutulub.

Lixaçov layihədə yerli podratçıların fəal iştirak etdiyini qeyd edib. Rosatomun qiymətləndirməsinə görə, lokallaşdırma səviyyəsi 40 faizə çata bilər. Onun sözlərinə görə, bu, layihənin iqtisadi səmərəliliyini artıracaq və korporasiyanın digər ölkələrdəki obyektlərinin tikintisində iştirak edə biləcək mütəxəssislər hazırlamağa imkan verəcək. Hazırda təxminən 350 nəfər Daşkənddəki MEPhI filialında, təxminən 900 nəfər isə Rusiyanın universitetlərində təhsil alır.