Türkmenistan we Katar ikitaraplaýyn hyzmatdaşlygyň geljegini ara alyşdy

Türkmenistanyň Söwda we daşary ykdysady gatnaşyklar ministri Nazar Agahanow we Katarýň daşary söwda boýunça döwlet ministri Ahmad bin Mohammed Al-Saýed 26-njy oktýabrda Dohada geçirilýän 9-njy Bütindünýä maýa goýum forumynyň çäklerinde ikitaraplaýyn hyzmatdaşlygyň geljegini ara alyşdylar. Bu barada Türkmenistanyň Katardaky Ilçihanasy habar berdi.

Taraplar Türkmenistan we Katar gatnaşyklarynyň dürli ugurlarda oňat ösýändigini belläp, Türkmenistan–Katar Hökümetara söwda-ykdysady hyzmatdaşlyk komissiýasynyň ähmiýetini nygtadylar. Şeýle hem Agahanow we Al-Saýed ikitaraplaýyn hyzmatdaşlygyň dürli ugurlarynda başlangyçlaryň durmuşa geçirilmegi barada pikir alyşdylar.

Forum 25–27-nji oktýabr aralygynda Dohada “Investing in the Future” (“Geljege maýa goýmak”) temasy bilen dowam edýär. Katar tarapyndan Birleşen Milletler Guramasynyň Söwda we ösüş boýunça konferensiýasy (UNCTAD) bilen bilelikde guralan forumda Katar habar agentliginiň (QNA) maglumatyna görä, 160dan gowrak ýurtdan 5 müňden gowrak gatnaşyjy bar.