Түрікменстан мен Катар екіжақты ынтымақтастық болашағын талқылады

Түрікменстанның Сауда және сыртқы экономикалық байланыстар министрі Назар Агаханов пен Катардың сыртқы сауда жөніндегі мемлекеттік министрі Ахмед бин Мохаммед Әл-Сайед 26 қазанда Доха қаласында өткен 9-шы Дүниежүзілік инвестициялық форум аясында екіжақты ынтымақтастықтың болашағын талқылады. Бұл туралы Түрікменстанның Катардағы елшілігі хабарлады.

Тараптар Түрікменстан мен Катар арасындағы қарым-қатынастың түрлі салаларда оң дамып жатқанын атап өтіп, Түрікмен-катар үкіметаралық сауда-экономикалық ынтымақтастық комиссиясының маңызын ерекше атап көрсетті. Сондай-ақ Агаханов пен Әл-Сайед екіжақты ынтымақтастықтың түрлі бағыттарындағы бастамаларды іске асыру мәселелері бойынша пікір алмасты.

Форум 25–27 қазан аралығында Доха қаласында «Investing in the Future» («Болашаққа инвестиция салу») тақырыбымен өтуде. Катар БҰҰ-ның Сауда және даму конференциясымен (ЮНКТАД) бірлесіп ұйымдастырған форумға Катар ақпарат агенттігінің (QNA) мәліметінше, 160-тан астам елден 5 мыңнан астам қатысушы жиналды.