Türkmənistan və Qətər ikitərəfli əməkdaşlıq perspektivlərini müzakirə edib

Türkmənistanın Ticarət və Xarici İqtisadi Əlaqələr naziri Nazar Ağakhanov və Qətərin Xarici ticarət üzrə Dövlət naziri Əhməd bin Məhəmməd Əl-Səyid oktyabrın 26-da Dohada keçirilən 9-cu Ümumdünya İnvestisiya Forumu çərçivəsində ikitərəfli əməkdaşlığın perspektivlərini müzakirə ediblər. Bu barədə Türkmənistanın Qətərdəki səfirliyi məlumat verib.

Tərəflər Türkmənistan və Qətər arasında münasibətlərin müxtəlif sahələrdə müsbət inkişaf etdiyini qeyd edib, Türkmənistan-Qətər Hökumətlərarası Ticarət-İqtisadi Əməkdaşlıq Komissiyasının əhəmiyyətini vurğulayıblar. Həmçinin Ağakhanov və Əl-Səyid ikitərəfli əməkdaşlığın müxtəlif istiqamətlərində təşəbbüslərin həyata keçirilməsi ilə bağlı fikir mübadiləsi aparıblar.

Forum oktyabrın 25-dən 27-dək Dohada “Investing in the Future” (“Gələcəyə investisiya”) mövzusu altında davam edir. Qətər tərəfindən Birləşmiş Millətlər Təşkilatının Ticarət və İnkişaf Konfransı (UNCTAD) ilə birgə təşkil olunan forumda Qətər Xəbər Agentliyinin (QNA) məlumatına görə, 160-dan çox ölkədən 5 mindən çox iştirakçı iştirak edir.