Özbegistanda lukmanlaryň we hemşireleriň aýlygy KPI-a we pasiýentleriň bahasyna baglanýar

Özbegistanda 2027-nji ýylyň 1-nji iýulyndan lukmançylyk we farmasewtika işgärleriniň döwlet hasaba alnyşy başlanar. Hasaba alnan lukmanlara 7 million som, hemşirelere 3,5 million som goşmaça töleg tölenmegi göz öňünde tutulýar. Prezident Şowkat Mirziýoýew muny 27-nji oktýabrda saglygy goraýyş we farmasewtika pudagynyň işgärleri bilen duşuşykda habar berdi.

Başlangyç tapgyrda hasaba alyş islege bagly bolar, 2030-njy ýyldan bolsa hökmany bolar. Hasaba alyş bäş ýyl güýjünde galar. Ygtyýarly edara hökmünde Lukmançylyk we farmasewtika işgärleriniň ukybyny bahalandyrmak merkezi kesgitlenen.

Prezident 2027-nji ýyldan lukmanlaryň we hemşireleriň aýlygynyň KPI görkezijilerine baglanmagyny we ilatyň lukmançylyk hyzmatyndan kanagatlanma derejesiniň esasy ölçeg boljakdygyny belledi. Pasiýent bahalarynyň nähili ýygnanjakdygy entek anyklanmady. Şeýle hem 26 ýöriteleşdirilen merkeziň direktorlary bir ýyllyk şertnama esasynda işlärler.