Oʻzbekistonda shifokor va hamshiralar maoshi KPI va bemorlar bahosiga bogʻlanadi

Oʻzbekistonda 2027-yil 1-iyuldan tibbiyot va farmatsevtika xodimlarini davlat roʻyxatidan oʻtkazish boshlanadi. Roʻyxatdan oʻtgan shifokor va farmatsevtlarga 7 million soʻm, hamshiralarga 3,5 million soʻm ustama toʻlanishi koʻzda tutilgan. Bu haqda prezident Shavkat Mirziyoyev 27-oktabr kuni sogʻliqni saqlash va farmatsevtika sohasi xodimlari bilan uchrashuvda maʼlum qildi.

Dastlabki bosqichda roʻyxatdan oʻtish ixtiyoriy boʻladi, 2030-yildan esa majburiy tus oladi. Roʻyxat besh yil amal qiladi. Vakolatli organ etib Tibbiyot va farmatsevtika xodimlarining malakasini baholash markazi belgilangan.

Prezident shifokor va hamshiralar oyligining 2027-yildan KPI koʻrsatkichlariga bogʻlanishini, bunda aholining tibbiy xizmatdan qoniqish darajasi asosiy mezon boʻlishini qayd etdi. Bemor baholarining qanday yigʻilishi hali aniqlashtirilmagan. Shuningdek, 2027-yildan 26 ta ixtisoslashgan markaz direktori bir yillik kontrakt asosida ishlaydi.