Özbəkistanda həkim və tibb bacılarının maaşları KPI və xəstə qiymətlərinə bağlanacaq

Özbəkistanda 2027-ci il iyulun 1-dən tibb və farmasevtika işçilərinin dövlət qeydiyyatına başlanılacaq. Qeydiyyatdan keçmiş həkim və farmasevtlərə 7 milyon somluq, tibb bacılarına isə 3,5 milyon somluq əlavə ödəniş nəzərdə tutulub. Bu barədə prezident Şavkat Mirziyoyev oktyabrın 27-də səhiyyə və farmasevtika sahəsinin işçiləri ilə görüşdə bildirib.

İlkin mərhələdə qeydiyyat könüllü olacaq, 2030-cu ildən isə məcburi olacaq. Qeydiyyat beş il etibarlı olacaq. Səlahiyyətli orqan kimi Tibb və Farmasevtika İşçilərinin Səriştəsinin Qiymətləndirilməsi Mərkəzi müəyyən edilib.

Prezident həkim və tibb bacılarının maaşlarının KPI göstəricilərinə bağlanmasını, əhalinin xidmətdən məmnunluq səviyyəsinin əsas meyar olacağını bildirib. Xəstə qiymətlərinin necə toplanacağı hələ dəqiqləşdirilməyib. Həmçinin 2027-ci ildən 26 ixtisaslaşmış mərkəzin direktorları bir illik müqavilə ilə işləyəcək, 130 min tibb işçisinin ixtisasının artırılması xərcləri dövlət tərəfindən ödəniləcək.