Azerbaýjan 2027-2028-nji ýyllarda gaýtadan dikeldilýän energiýa kuwwatyny 2 GW artdyrar

Azerbaýjanyň energetika ministriniň orunbasary Elnur Soltanow 2027-2028-nji ýyllarda ýurtda gaýtadan dikeldilýän energiýa çeşmelerinden 2 gigawatt goşmaça elektrik önümçilik kuwwatyny döretmek meýilleşdirilýändigini habar berdi. Ol muny Bakuda geçirilen Durnukly ösüş maksatlary (DÖM) boýunça 9-njy Dialogda aýtdy. Ýurt 2030-njy ýyla çenli gaýtadan dikeldilýän energiýanyň paýyny umumy gurnalan kuwwatyň 34 göterimine ýetirmegi maksat edinýär. Häzirki wagtda bu pay takmynan 21,5 göterimdir.

Orunbasaryň sözlerine görä, täze kuwwatlaryň takmynan 2 milliard dollar maýa goýumy çekmegi göz öňünde tutulýar. Birleşen Arap Emirlikleriniň Masdar kompaniýasy Azerbaýjanyň bu ugurdaky esasy strategik hyzmatdaşlarynyň biri bolup, 2028-nji ýyla çenli ýurtda 1 gigawattdan köp gaýtadan dikeldilýän energiýa kuwwatyny gurmagy meýilleşdirýär.

Soltanow elektrik torlaryny täzelemegiň we berkitmegiň hem möhümdigini nygtady. Onuň sözlerine görä, häzirki tor gaýtadan dikeldilýän energiýany zerur möçberde we çeýeligi bilen kabul edip bilmeýär. Gün we şemal stansiýalarynyň önümçiliginiň howa şertlerine baglydygy sebäpli, energiýany saklaýan ulgamlaryň we balanslaşdyrmanyň hem giňeldilmelidigini belledi.