Ozarbayjon 2027-2028 yillarda qayta tiklanuvchi energiya quvvatini 2 GVtga oshiradi

Ozarbayjon energetika vazirining oʻrinbosari Elnur Soltanov 2027-2028 yillarda mamlakatda qayta tiklanuvchi energiya manbalaridan 2 gigavatt qoʻshimcha elektr quvvati yaratish rejalashtirilganini maʼlum qildi. U bu haqda Bokuda oʻtkazilgan Barqaror rivojlanish maqsadlari (BRM) boʻyicha 9-dialogda gapirdi. Mamlakat 2030 yilga borib qayta tiklanuvchi energiya ulushini oʻrnatilgan quvvatning 34 foizigacha yetkazishni maqsad qilgan. Hozirda bu ulush taxminan 21,5 foizni tashkil etadi.

Soltanovning soʻzlariga koʻra, yangi quvvatlar qariyb 2 milliard dollar investitsiya jalb qilishi kutilmoqda. Birlashgan Arab Amirliklarining Masdar kompaniyasi Ozarbayjonning bu sohadagi asosiy strategik hamkorlaridan biri boʻlib, 2028 yilgacha mamlakatda 1 gigavattdan ortiq qayta tiklanuvchi energiya quvvati yaratishni rejalashtirmoqda.

Soltanov elektr tarmoqlarini modernizatsiya qilish va mustahkamlash ham muhimligini taʼkidladi. Uning aytishicha, hozirgi tarmoq qayta tiklanuvchi energiyani kerakli hajmda va moslashuvchanlik bilan qabul qila olmaydi. Quyosh va shamol stansiyalarining ishlab chiqarishi ob-havoga bogʻliq boʻlgani sababli, energiyani saqlash tizimlari va balanslashni kengaytirish zarurligini qayd etdi.