Азербайжан 2027-2028-жылдары жаңыланып турган энергия кубатын 2 ГВтка көбөйтөт

Азербайжандын энергетика министринин орун басары Эльнур Солтанов 2027-2028-жылдары өлкөдө жаңыланып турган энергия булактарынан электр энергиясын өндүрүүчү кошумча 2 гигаватт кубат түзүү пландалып жатканын билдирди. Ал бул жөнүндө Бакуда өткөн Туруктуу өнүгүү максаттары (ТӨМ) боюнча 9-диалогдо сүйлөдү. Өлкө 2030-жылга чейин жаңыланып турган энергиянын үлүшүн орнотулган жалпы кубаттын 34 пайызына жеткирүүнү максат кылып жатат. Учурда бул үлүш болжол менен 21,5 пайыз.

Орун басардын айтымында, жаңы кубаттар болжол менен 2 миллиард доллар инвестиция тартышы мүмкүн. БАЭнин Masdar компаниясы Азербайжандын бул тармактагы негизги стратегиялык өнөктөштөрүнүн бири болуп саналат жана 2028-жылга чейин өлкөдө 1 гигаваттан ашык жаңыланып турган энергия кубатын түзүүнү пландаштырып жатат.

Солтанов электр тармактарын жаңылоо жана бекемдөө да маанилүү экенин белгиледи. Анын сөзүнө караганда, учурдагы тармак жаңыланып турган энергияны керектүү көлөмдө жана ийкемдүүлүк менен кабыл ала албайт. Күн жана шамал станцияларынын өндүрүшү аба ырайына көз каранды болгондуктан, энергияны сактоо системалары жана балансташтыруу да маанилүү. Диалогду Экономика министрлиги, Туруктуу өнүгүү боюнча улуттук координациялык кеңеш жана БУУ уюштурат.