Serdar Berdimuhamedow türkmen manadynyň 33 ýyllygyny gutlady

Türkmenistanyň Prezidenti Serdar Berdimuhamedow ýurduň milli pul birligi — manadyň dolanyşyga girizilmeginiň 33 ýyllygy mynasybetli bank ulgamynyň işgärlerini we ähli halky gutlady.

Berdimuhamedowyň sözlerine görä, milli manat ykdysady durnukly we sazlaşykly ösüşi üpjün etmäge, kadaly pul dolanyşygyna we ýeke-täk döwlet pul-karz syýasatynyň netijeli amala aşyrylmagyna şertler döredipdir. Habarda banklaryň ykdysadyýetiň pudaklaryna berýän karzlarynyň möçberiniň artdyrylandygy bellenilýär. Şeýle hem uzak möhletli uly möçberli karz serişdeleriniň senagatlaşdyrmak, eksport kuwwatyny ýokarlandyrmak we täze iş orunlaryny döretmek üçin ulanylýandygy aýdylýar.

Habarda bank ulgamyna sanly tehnologiýalaryň ornaşdyrylandygy, elektron töleg ulgamlarynyň giňeldilendigi hem-de Halkara pul gaznasy, Bütindünýä banky, Aziýanyň ösüş banky, Yslam ösüş banky, Ýewropanyň täzeleniş we ösüş banky we Fitch Ratings bilen hyzmatdaşlygyň ösdürilendigi nygtalýar. Şeýle hem ilatyň jan başyna düşýän jemi içerki önümiň dünýäniň ýokary girdejili döwletleriniň ortaça derejesine ýetendigi belleýär.