Serdar Berdimuhamedov Turkmaniston manatining 33 yilligini tabrikladi

Turkmaniston Prezidenti Serdar Berdimuhamedov mamlakatning milliy pul birligi — manat muomalaga kiritilganining 33 yilligi munosabati bilan bank tizimi xodimlari va butun xalqni tabrikladi.

Berdimuhamedovning taʼkidlashicha, milliy manat iqtisodiyotning barqaror va uygʻun rivojlanishini taʼminlash, pul muomalasining barqarorligi hamda yagona davlat pul-kredit siyosatining samarali amalga oshirilishi uchun qulay shart-sharoit yaratgan. Xabarda banklarning iqtisodiyot tarmoqlariga beradigan kreditlari hajmi oshirilgani qayd etilgan. Shuningdek, yirik hajmdagi uzoq muddatli kredit mablagʻlari sanoatlashtirish, eksport salohiyatini oshirish va yangi ish oʻrinlari yaratishga yoʻnaltirilayotgani aytilgan.

Xabarda bank tizimiga raqamli texnologiyalar joriy etilgani, elektron toʻlov tizimlari kengaytirilgani hamda Xalqaro valyuta fondi, Jahon banki, Osiyo taraqqiyot banki, Islom taraqqiyot banki, Yevropa tiklanish va taraqqiyot banki hamda Fitch Ratings bilan hamkorlik rivojlantirilgani taʼkidlangan. Bundan tashqari, aholi jon boshiga yalpi ichki mahsulot dunyoning yuqori daromadli davlatlari oʻrtacha darajasiga yetgani bildirilgan.