Сердар Бердімұхамедов түрікмен манатының 33 жылдығын құттықтады

Түрікменстан Президенті Сердар Бердімұхамедов ұлттық ақша бірлігі — манаттың айналысқа енгізілгеніне 33 жыл толуына орай банк жүйесі қызметкерлерін және барлық халқын құттықтады.

Бердімұхамедовтың айтуынша, ұлттық манат экономиканың тұрақты және үйлесімді дамуын қамтамасыз етуге, ақша айналымының тұрақтылығына және бірыңғай мемлекеттік ақша-несие саясатының тиімді жүзеге асырылуына қолайлы жағдай жасаған. Үндеуде банктердің экономика салаларына берген несиелерінің көлемі артқаны атап өтілген. Сондай-ақ ірі көлемдегі ұзақ мерзімді несие қаражаттары индустрияландыруға, экспорттық әлеуетті арттыруға және жаңа жұмыс орындарын құруға бағытталып отыр делінген.

Үндеуде банк жүйесіне цифрлық технологиялардың енгізілгені, электрондық төлем жүйелерінің кеңейгені, сондай-ақ Халықаралық валюта қоры, Дүниежүзілік банк, Азия даму банкі, Ислам даму банкі, Еуропаның қайта құру және даму банкі және Fitch Ratings агенттігімен ынтымақтастық дамып жатқаны айтылған. Сонымен қатар жан басына шаққандағы жалпы ішкі өнім әлемнің жоғары табысты елдерінің орташа деңгейіне жеткені мәлімделген.