Serdar Berdimuhamedov Türkmənistan manatının 33 illiyini təbrik etdi

Türkmənistanın Prezidenti Serdar Berdimuhamedov ölkənin milli pul vahidi manatın dövriyyəyə buraxılmasının 33 illiyi münasibətilə bank sistemi işçilərini və bütün xalqı təbrik edib.

Berdimuhamedovun sözlərinə görə, milli manat iqtisadi davamlı və ahəngdar inkişafın təmin edilməsinə, normal pul dövriyyəsinə və vahid dövlət pul-kredit siyasətinin effektiv həyata keçirilməsinə şərait yaradıb. Mesajda bankların iqtisadiyyatın sahələrinə verdiyi kreditlərin həcminin artırıldığı qeyd edilir. Həmçinin iri həcmli uzunmüddətli kredit vəsaitlərinin sənayeləşmə, ixrac potensialının artırılması və yeni iş yerlərinin yaradılması üçün istifadə olunduğu bildirilir.

Mesajda bank sisteminə rəqəmsal texnologiyaların tətbiq edildiyi, elektron ödəniş sistemlərinin genişləndirildiyi və Beynəlxalq Valyuta Fondu, Dünya Bankı, Asiya İnkişaf Bankı, İslam İnkişaf Bankı, Avropa Yenidənqurma və İnkişaf Bankı və Fitch Ratings ilə əməkdaşlığın inkişaf etdirildiyi vurğulanır. Həmçinin adambaşına düşən ümumi daxili məhsulun dünyanın yüksək gəlirli ölkələrinin orta səviyyəsinə çatdığı bildirilir.