Gazagystan Milli gaznadan 6,5 trillion tenge sosial we infrastruktura taslamalaryna bölüp berer

Gazagystan Milli gaznadan takmynan 6,5 trillion tenge serişdäni sosial we infrastruktura taslamalaryna ugratmagy meýilleşdirýär. Bu barada Hökümet mejlisinde Premýer-ministriň orunbasary we Milli ykdysadyýet ministri Serik Žumangarin habar berdi.

Ministr Döwlet Baştutanynyň Gazagystan halkyna Ýüzlenmesini durmuşa geçirmek boýunça Umumymilli çäreler meýilnamasynyň taslamasyny tanyşdyrdy. 12 ugry öz içine alýan meýilnama 96 çäreden ybarat. Meýilnamanyň çäginde «Halk gurluşygy» infrastruktura ösdürmek programmasy tassyklanar; ýerli gurluşyk materiallaryny we enjamlaryny ulanmak we işleriň hilini gözegçilikde saklamak göz öňünde tutulýar. Şeýle hem kommunal hyzmatlary täzelemek, öý gurluşygyny dowam etdirmek we ilatly ýerleri içilýän suw we gaz bilen üpjün etmek meýilleşdirilýär.

Ulag pudagynda Zaysan, Katonkaragaý we Kendirlide täze howa menzillerini 2027-nji ýylyň maý aýynda ulanyşa bermek meýilleşdirilýär. Astanada täze howa menzilini gurmak indiki ýylyň iýun aýynda başlanar. «Bakty – Aýagöz» demir ýol liniýasynyň gurluşygyny 2027-nji ýylyň ahyryna çenli tamamlamak göz öňünde tutulýar. Aral – Hazar we Kökşetau – Petropawl ýollary bilen birlikde awtomobil ýollaryny gurmak we täzelemek işleri dowam eder.