Ұлттық қордан 6,5 трлн теңге әлеуметтік және инфрақұрылым жобаларына бөлінеді

Қазақстанда Ұлттық қордан шамамен 6,5 трлн теңгені әлеуметтік және инфрақұрылымдық жобаларға бағыттау жоспарланып отыр. Бұл туралы Үкімет отырысында Премьер-министрдің орынбасары – Ұлттық экономика министрі Серік Жұманғарин мәлімдеді.

Министр Мемлекет басшысының Қазақстан халқына Жолдауын жүзеге асыру жөніндегі Жалпыұлттық іс-шаралар жоспарының жобасын таныстырды. 12 бағытты қамтитын жоспар 96 іс-шарадан тұрады. Жоспар аясында «Халықтық құрылыс» инфрақұрылымдық даму бағдарламасы бекітіледі. Бағдарламада отандық құрылыс материалдары мен жабдықтарды пайдалану көзделген, жұмыстар сапасын бақылау қамтамасыз етіледі. Сондай-ақ ТКШ-ні жаңғырту, тұрғын үй құрылысын жалғастыру, елді мекендерді ауыз сумен және газбен қамтамасыз ету жоспарланған.

Көлік инфрақұрылымы бойынша 2027 жылдың мамырында Зайсан, Қатонқарағай және Кендірлі елді мекендерінде жаңа әуежайлар пайдалануға берілетін болады. Астанада жаңа әуежайдың құрылысы келесі жылдың маусымында басталмақ. «Бақты – Аягөз» теміржол желісінің құрылысын 2027 жылдың соңына дейін аяқтау көзделген. Сондай-ақ «Арал – Каспий» және «Көкшетау – Петропавл» трассаларын қоса алғанда, жол құрылысы мен жаңғырту жұмыстары жалғасады.