Qozogʻiston Milliy fonddan 6,5 trillion tenge ijtimoiy va infratuzilma loyihalariga ajratadi

Qozogʻiston Milliy fonddan taxminan 6,5 trillion tenge mablagʻni ijtimoiy va infratuzilma loyihalariga yoʻnaltirishni rejalashtirmoqda. Bu haqda Hukumat majlisida Bosh vazirning oʻrinbosari hamda Milliy iqtisodiyot vaziri Serik Jumangʻarin maʼlum qildi.

Vazir Davlat rahbarining Qozogʻiston xalqiga Murojaatini amalga oshirish boʻyicha Umummilliy tadbirlar rejasi loyihasini taqdim etdi. 12 yoʻnalishni qamrab olgan reja 96 ta tadbirdan iborat. Reja doirasida «Xalqchil qurilish» infratuzilmani rivojlantirish dasturi tasdiqlanadi; mahalliy qurilish materiallari va jihozlaridan foydalanish hamda ishlar sifatini nazorat qilish koʻzda tutilgan. Shuningdek, kommunal xizmatlarni modernizatsiya qilish, uy-joy qurilishini davom ettirish hamda aholi punktlarini ichimlik suvi va gaz bilan taʼminlash rejalashtirilgan.

Transport sohasida Zaysan, Qatonqarogʻay va Kendirlida yangi aeroportlarni 2027-yil may oyida foydalanishga topshirish rejalashtirilgan. Astanada yangi aeroport qurilishi kelgusi yilning iyun oyida boshlanadi. «Baqti – Oyagoz» temir yoʻl liniyasi qurilishini 2027-yil oxirigacha yakunlash koʻzda tutilgan. Oral – Kaspiy va Koʻkshetau – Petropavl yoʻnalishlari bilan birga, avtomobil yoʻllarini qurish va qayta tiklash ishlari davom etadi.