Türkmenistan däl, Özbegistanda içilýän suw tarifleri: Taşkentde 1 400, Surhandarýada 6 800 sum

Özbegistanyň paýtagty Taşkentde merkezleşdirilen suw üpjünçilik ulgamy arkaly ilata berilýän içilýän suwuň bir litriniň bahasy 1 sum 40 tiýin. Bu barada 30-njy oktýabrda geçirilen matbugat konferensiýasynda «Uzsuwtaminot» AÇ-nyň wekilleri habar berdi. Ýurt boýunça ilat üçin içilýän suw tarifi kub metr başyna ortaça 4 217 sum bolup, bu bir litr üçin takmynan 4 sum 22 tiýine deňdir.

Görkezilişde iň pes tarifiň Taşkentde kub metr başyna 1 400 sum bolup, ol 2023-nji ýylyň 15-nji dekabryndan bäri üýtgemändigi, iň ýokary tarifiň bolsa Surhandarýa welaýatynda 6 800 sum bolandygy aýdyldy. Kompaniýa sebitleriň arasyndaky tapawudy tebigy we geografik şertlere, suw çeşmeleriniň elýeterliligine, şeýle hem daşamak we arassalamak çykdajylaryna baglady. Daglyk sebitlerde çeşmeler ýakyn we hilli bolany üçin çykdajy arzan, gurak sebitlerde bolsa suw beýleki sebitlerden turbalar arkaly getirilýär.

Şeýle hem ilatyň içilýän suw we kanalizasiýa hyzmatlary boýunça karzynyň ýurt boýunça 430,7 milliard sume ýetendigi, iň uly karzyň 92,9 milliard sum bilen Taşkentde bolandygy belläp geçildi. Kanunçylyga görä, bu hyzmatlaryň tölegi her aýyň 10-syna çenli doly möçberde öňünden tölenmelidir.