Ozarbayjon ozod etilgan hududlarni tiklash uchun qariyb 15,3 mlrd dollar ajratdi

Ozarbayjon 2020–2026-yillarda davlat byudjetidan ozod etilgan hududlarni tiklash va qayta qurish uchun qariyb 26 milliard manat (taxminan 15,3 milliard dollar) ajratgani aytildi. Iqtisodiyot vazirligi apparati rahbari Elvin Jamalov bu haqda 2027-yil davlat byudjeti toʻgʻrisidagi qonun loyihasini parlamentning iqtisodiy siyosat, sanoat va tadbirkorlik qoʻmitasi majlisida birinchi oʻqishda taqdim etar ekan, maʼlum qildi.

Jamalovning aytishicha, Agʻdam sanoat parki va Aras vodiysi iqtisodiy zonasi sanoat parkida 60 ta xoʻjalik subyekti roʻyxatdan oʻtgan. Bu parklar hozirgacha taxminan 3 milliard manat (taxminan 1,8 milliard dollar) qiymatidagi mahsulot ishlab chiqargan. Ozod etilgan hududlarda 1300dan ortiq xususiy sektor loyihasi amalga oshirilmoqda. Ikki investitsiya forumida imzolangan kelishuvlarning umumiy qiymati 20 milliard dollardan oshgan.

Parlamentga taqdim etilgan Soliq kodeksiga kiritilishi taklif etilgan oʻzgartirishlarning asosiy maqsadi eksport qiluvchi va shaffof faoliyat yuritayotgan biznesni qoʻllab-quvvatlash ekani aytildi. Loyihada mahalliy ishlab chiqarish, xizmatlar eksporti va turizm sohasida xorijliklarga koʻrsatilgan xizmatlardan olinadigan daromadlar uchun foyda va daromad soligʻidan ozod etish nazarda tutilgan. Sogʻliqni saqlash va qishloq xoʻjaligi kabi bir qator sohalardagi mavjud soliq imtiyozlari muddatini uzaytirish ham kutilmoqda.