Erdoʻgʻan: Ozarbayjon bilan munosabatlarimiz klassik diplomatik aloqalardan ancha ustun

Turkiya Prezidenti Rajab Toyyib Erdoʻgʻan, Turkiya va Ozarbayjon oʻrtasidagi munosabatlar klassik diplomatik aloqalardan ancha ustun ekanini taʼkidladi. U ikki davlat oʻrtasidagi aloqa umumiy tarix, madaniyat, taqdir va kelajakning mahsuli ekanini aytdi. Erdoʻgʻan: "Ikki davlatning uzilmas aloqasi umumiy tariximizning, madaniyatimizning, taqdirimizning va inshallo, kelajagimizning mahsulidir", dedi.

Erdoʻgʻan Ozarbayjonning 8-noyabr Gʻalaba kuni munosabati bilan, favqulodda vaziyat yuz bermasa, 8-noyabrda Bokuga tashrif buyurishni rejalashtirayotganini eʼlon qildi. Tashrif doirasida muhim uchrashuvlar oʻtkazishni maqsad qilganini bildirdi.

Erdoʻgʻan Ozarbayjon Prezidenti Ilhom Aliyev bilan telefon orqali suhbatlashganini, Razvedka boshligʻi va tashqi ishlar vazirini Ozarbayjonga yuborganini aytib, ikki davlat oʻrtasida jadal diplomatik faollik olib borilayotganini qayd etdi.