Davlat tilining taraqqiyotidagi muhim qadam

Oʻzbekiston Respublikasi Prezidenti 21 oktyabr — Oʻzbek tili bayrami kuni lotin yozuviga asoslangan oʻzbek alifbosini takomillashtirishga qaratilgan qonunni imzoladi. Bu davlat tilining taraqqiyotidagi muhim voqea boʻldi.

Oʻzbekiston Ekologik partiyasi Markaziy Kengashi raisining oʻrinbosari, Oʻzbekiston Yozuvchilar uyushmasi aʼzosi Islomjon Qoʻchqorov oʻzgarishlarning ahamiyati haqida fikr bildirdi. Uning soʻzlariga koʻra, qonunning qabul qilinishi chinakam tarixiy voqeadir. Alifboni takomillashtirish ayrim harflar shaklini oʻzgartirish emas, balki oʻzbek tilining zamonaviy imkoniyatlarini kengaytirish, uning raqamli makondagi oʻrnini mustahkamlash va davlat tilidan foydalanishdagi amaliy muammolarni bartaraf etishga qaratilgan muhim qadam ekani taʼkidlandi.

Qonunda Ö, Ğ, Ş va Ç harflarini joriy etish nazarda tutilgan. Qonunning muhim jihatlaridan biri oʻtish jarayonida fuqarolar va tashkilotlarning huquq hamda manfaatlarini hisobga olishdir. Hozirgi alifboga asosan rasmiylashtirilgan hujjatlar, milliy valyuta va qimmatli qogʻozlar oʻz kuchini saqlab qoladi, ayrim peshlavha va koʻrsatkichlar esa belgilangan tartibda bosqichma-bosqich almashtiriladi.