Ozarbayjon davlat xizmatchilari va harbiylar uchun pensiya islohotini rejalashtirmoqda

Ozarbayjonda pensiya tizimida bir qator oʻzgarishlarni amalga oshirish rejalashtirilmoqda. Yangiliklar davlat xizmatchilarini, Mudofaa vazirligi tizimida xizmat qilayotgan harbiy xizmatchilarni hamda xizmat muddatiga koʻra pensiya oluvchi shaxslarni qamrab oladi. Day.Az xabariga koʻra, bu toifalar boʻyicha pensiyalar hozircha asosan ish haqi yoki soʻnggi taʼminot xarajatiga koʻra belgilanadi.

Taklif etilayotgan yangi mexanizmga koʻra, pensiyani hisoblashda asosiy mezon shaxsiy hisobvarakda toʻplangan pensiya kapitali boʻladi. Ustamalar davlat xizmatchilari uchun lavozimning maʼmuriy tasnifiga, harbiylar uchun harbiy unvonga, xizmat muddati boʻyicha pensiya oluvchilar uchun esa aniq lavozimlar boʻyicha belgilangan miqdorda boʻladi. Pensiyalar murojaat qilinmasdan, elektron tizimlardagi maʼlumotlar asosida proaktiv tarzda tayinlanadi.

Indeksatsiya qoidalarini yangilash ham kun tartibida. Hozirda mehnat pensiyalari oʻrtacha oylik nominal ish haqining oʻsishiga, shaxsiy hisobvaraklardagi pensiya kapitali esa isteʼmol narxlari indeksiga koʻra indeksatsiya qilinadi. Yangi taklifga koʻra, kam miqdordagi pensiya va kapitallar avvalgidek toʻliq indeksatsiya qilinadi, yuqori miqdorlar uchun esa boshqacha hisoblash mexanizmi qoʻllanadi. Asosiy maqsad sugʻurta tamoyillarini kuchaytirish, kam pensiyalarni oshirish va tizimning uzoq muddatli moliyaviy barqarorligini taʼminlashdir.