Qozogʻistonda ishsizlarni roʻyxatga olish qoidalari oʻzgardi: ish izlash uchun 13 kun beriladi

Qozogʻistonda ish izlovchilar va ishsizlarni roʻyxatga olishning yangi usullarini belgilovchi pilot loyiha ishga tushirildi. Egemen Qazaqstan xabar berishicha, 22 oktyabrda eʼlon qilingan va 1 oktyabrdan kuchga kirgan hujjatga koʻra, yangi tizim bandlik sohasini raqamlashtiradi va rasmiylashtirish tartiblarini sezilarli darajada soddalashtiradi. Ishi va daromadi boʻlmagan, munosib ish izlayotgan shaxs yashash joyidagi karyera markaziga yoki Elektron mehnat birjasi platformasiga murojaat qilishi mumkin. Murojaat paytida u shaxsiy maʼlumotlarini toʻplash va qayta ishlashga rozilik berishi kerak. Hujjatlar tekshirilgandan soʻng, shaxs bir ish kuni ichida ish izlovchi sifatida roʻyxatga olinadi.

2026-yil 1 oktyabrdan boshlab pilot loyiha doirasida ish izlovchiga mos boʻsh ish oʻrinlarini tanlash uchun roʻyxatga olingan kundan boshlab 13 taqvim kuni beriladi. Shu muddat davomida Elektron mehnat birjasi boʻsh ish oʻrinlarini avtomatik tanlaydi, karyera markazi esa fuqaroga munosib ish topishda yordam berishi shart. 13 kun ichida ishga joylashmagan shaxs avtomatik ravishda ishsiz sifatida roʻyxatga olinadi. Biroq Ijtimoiy kodeksning 99-moddasi 3-qismida koʻrsatilgan toifalarga, jumladan 16 yoshga toʻlmaganlarga, ishlovchilarga va pensiya yoshiga yetganlarga bu tartib qoʻllanmaydi.

Uch ta munosib ish taklifidan voz kechgan yoki belgilangan muddatda javob bermagan ishsiz roʻyxatdan chiqariladi va qayta roʻyxatdan oʻtish uchun 30 taqvim kuni kutishi kerak. Xabarda Qozogʻistonda NEET toifasidagi yoshlar ulushi kamayib borayotgani ham qayd etilgan.