Қазақстанда жұмыссыздарды тіркеу ережесі өзгерді: жұмыс іздеуге 13 күн беріледі

Қазақстанда жұмыс іздеушілер мен жұмыссыздарды тіркеудің жаңа тәсілдерін айқындайтын пилоттық жоба іске қосылды. Egemen Qazaqstan хабарлауынша, 22 қазанда жарияланып, 1 қазаннан күшіне енген құжатқа сәйкес, жаңа жүйе жұмыспен қамту саласын цифрландырып, рәсімдерді айтарлықтай жеңілдетеді. Жұмысы мен табысы жоқ, лайықты жұмыс іздеп жүрген адам тұрғылықты жері бойынша мансап орталығына немесе Электрондық еңбек биржасы платформасы арқылы тіркелуге өтініш бере алады. Өтініш берген кезде ол дербес деректерін жинауға және өңдеуге келісім беруі керек. Құжаттар тексерілгеннен кейін адам бір жұмыс күні ішінде жұмыс іздеуші ретінде тіркеледі.

2026 жылғы 1 қазаннан бастап пилоттық жоба аясында жұмыс іздеушіге бос жұмыс орындарын іріктеу үшін тіркелген күннен бастап 13 күнтізбелік күн беріледі. Осы мерзімде Электрондық еңбек биржасы бос жұмыс орындарын автоматты түрде іріктейді, ал мансап орталығы азаматқа лайықты жұмыс табуға көмектесуге міндетті. 13 күн ішінде жұмысқа орналаспаған адам автоматты түрде жұмыссыз ретінде тіркеледі. Алайда Әлеуметтік кодекстің 99-бабы 3-тармағында көрсетілген санаттарға, соның ішінде 16 жасқа толмағандарға, жұмыспен қамтылғандарға және зейнеткерлік жасқа жеткендерге бұл тәртіп қолданылмайды.

Үш лайықты жұмыс нұсқасынан бас тартқан немесе белгіленген мерзімде жауап бермеген жұмыссыз есептен шығарылады және қайта тіркелу үшін 30 күнтізбелік күн күтуі керек. Хабарда Қазақстанда NEET санатындағы (білімі, жұмысы немесе кәсіби даярлығы жоқ) жастардың үлесі азайып келе жатқаны да айтылған.