Qirgʻiziston xorijiy kompaniyalarning bank hisobvaragʻi ochishi uchun 200 ming soʻm toʻlov taklif qilmoqda

Qirgʻiziston Iqtisodiyot va savdo vazirligi norezident kompaniyalarning Qirgʻiziston banklarida hisobvaraq ochishi va uni yuritishi uchun toʻlanadigan yigʻimning shaffof tartibini belgilovchi qaror loyihasini jamoatchilik muhokamasiga chiqardi.

Loyihaga koʻra, norezident yuridik shaxslar uchun akkreditatsiya ruxsatnomasi evaziga 200 ming soʻm yigʻim olish taklif etilmoqda. Vazirlik qoshidagi “Qirgʻiz eksportini rivojlantirish va targʻib qilish markazi” davlat muassasasi arizalarni qabul qilib koʻrib chiqishi, hujjatlarni tekshirishi, akkreditatsiyadan oʻtgan xorijiy kompaniyalar reestrini yuritishi hamda Milliy bank, tijorat banklari va davlat organlari bilan hamkorlik qilishi belgilangan. Yigʻim 2026-yil avgust oyida Soliqsiz daromadlar toʻgʻrisidagi kodeksning 51-moddasiga kiritilgan, biroq toʻlov tartibi, toʻlovni tasdiqlash va ariza beruvchining harakatlari batafsil belgilanmagan edi.

Mualliflarning taʼkidlashicha, chet el yuridik shaxslari Qirgʻizistonning tijorat banklarida hisobvaraq ochishga tobora koʻproq qiziqish bildirmoqda. Bu tashqi savdo aloqalari, investitsiyalar va Bishkekning mintaqaviy moliya hamda savdo markazi boʻlish intilishi bilan bogʻliq. Qaror qonunchilikni yagona qoʻllashni, shaffoflik va bashorat qilinuvchanlikni taʼminlashni, shu bilan birga pul yuvishga va terrorizmni moliyalashtirishga qarshi kurash talablariga rioya etilishini hamda sanktsiya va muvofiqlik xavflarini kamaytirishni maqsad qilgani qayd etilgan.