Oʻzbekistonda islom moliyasi kengayadi: 2026–2030 yoʻl xaritasi va 39 ta chora-tadbir

Oʻzbekiston Markaziy banki raisi Timur Ishmetov mamlakatda 2030 yilgacha islom moliyasini rivojlantirish boʻyicha 39 ta chora-tadbir amalga oshirilishini maʼlum qildi. U buni 27-oktyabr kuni Samarqandda boʻlib oʻtayotgan Islom moliyasi xalqaro forumida aytdi. 2026–2030 yillarga moʻljallangan yoʻl xaritasi beshta yoʻnalishni oʻz ichiga oladi: qonunchilikni takomillashtirish, mutaxassislar salohiyati va moliyaviy savodxonlikni oshirish, xalqaro hamkorlikni kengaytirish hamda islomiy bank xizmatlari uchun infratuzilma yaratish.

Dastlabki bosqichda islom moliyasi xizmatlari nobank sektori orqali yoʻlga qoʻyildi. Ishmetovning maʼlum qilishicha, hozirda 11 ta mikromoliya tashkiloti murabaha, ijara, muzoraba va mushoraka shartnomalari asosida xizmat koʻrsatmoqda. 2026 yilda islomiy bank faoliyatini joriy etishga qaratilgan qonun qabul qilingani qayd etildi. Qonun toʻlaqonli islom banklarini tashkil etish va anʼanaviy banklarda «islomiy darchalar» ochish uchun huquqiy asos yaratdi.

Hukumat islomiy qimmatli qogʻozlar — sukuk bozorini rivojlantirishni rejalashtirmoqda. «Kapital bozori toʻgʻrisida»gi qonun loyihasining yangi tahririda sukukka bagʻishlangan alohida bob nazarda tutilgan. Ishmetov sukuk chiqarish boshlangani emas, balki buning uchun huquqiy asos yaratilayotganini aytdi.