Oʻzbekistonda oʻrtacha ish haqi 7,3 mln soʻm, medianali ish haqi 4,2 mln soʻm

Milliy statistika qoʻmitasi birinchi marta oʻrtacha oylik nominal ish haqi bilan birga medianali ish haqini ham eʼlon qildi. Maʼlumotlarga koʻra, 2026 yilning yanvar-sentyabr oylarida Oʻzbekistonda oʻrtacha oylik nominal ish haqi 7 mln 274,1 ming soʻmni tashkil etgan. Bu koʻrsatkich 2025 yilning mos davriga nisbatan 18 foizga oshgan. Eksperimental hisob-kitoblarga koʻra, shu davrda respublika boʻyicha medianali ish haqi 4 mln 166,3 ming soʻm boʻlgan.

Hududlar kesimida eng yuqori oʻrtacha ish haqi 12 mln 300,8 ming soʻm bilan Toshkent shahrida, eng past koʻrsatkich esa 4 mln 969,7 ming soʻm bilan Qashqadaryo viloyatida qayd etilgan. Iqtisodiy faoliyat turlari boʻyicha bank, sugʻurta, lizing, kredit va vositachilik faoliyati 19 mln 712,6 ming soʻm bilan birinchi oʻrinda turadi. Sogʻliqni saqlash va ijtimoiy xizmatlar esa 4 mln 454,2 ming soʻm bilan eng past koʻrsatkichga ega.

Qoʻmita izohiga koʻra, ish haqi darajasini baholashda oʻrtacha va medianali koʻrsatkichlar birgalikda qoʻllaniladi. Oʻrtacha ish haqi aksariyat xodimlar shuncha maosh olishini anglatmaydi. Gazeta.uz eslatib oʻtdi, qoʻmita avval sinov tariqasida medianali ish haqi va modal intervalni hisoblayotgani haqida xabar bergan edi.