Turkiy davlatlar tashkilotiga raislik Turkiyaga oʻtadi

Qozogʻiston Prezidenti Qosim-Jomart Toqayev Turkiy davlatlar tashkiloti sammitida tashkilotni institutsional rivojlantirishga alohida eʼtibor berishga chaqirdi. Akordaning matbuot xizmatiga tayanib Egemen Qazaqstan xabar berishicha, Toqayev tashkilot faoliyat doirasi kengayganini va 60 yoʻnalishda ish olib borilayotganini aytdi. Baʼzi ishlar bir-birini takrorlashini qayd etgan Toqayev, ustuvor sohalarni belgilash zarurligini taʼkidladi.

Toqayev soʻnggi yillarda Ozarbayjonning raisligi uchun minnatdorchilik bildirib, tashkilot raisligi endi Turkiyaga oʻtishini eslatdi. U Kubanichbek Omuraliyevning faoliyati uchun rahmat aytdi va yangi Bosh kotib Mirvohid Azimovga omad tiladi. Toqayev, shuningdek, tashkilot harbiy ittifoq emasligini va boʻlmasligi kerakligini, tashkilot huzurida Doimiy vakillar kengashini tuzish muhimligini aytdi.

Sammitda Rajab Tayyib Erdoʻgʻon, Sadir Japarov, Shavkat Mirziyoyev va Serdar Berdimuhamedov ham soʻzga chiqdi. 13-sammit yakunlari boʻyicha Anqara deklaratsiyasi qabul qilindi.