Tokayevning xalqqa murojaati: suverenitet tayanchi – xavfsizlik

Qozogʻiston Prezidenti Qosim-Jomart Toqayevning “Yangi tarixiy bosqichdagi Qozogʻistonning dolzarb vazifalari” mavzusidagi xalqqa Murojaati mamlakatning uzoq muddatli rivojlanish yoʻnalishini belgiladi. Hujjatda iqtisodiyotni rivojlantirish, infratuzilmani yangilash, raqamli imkoniyatlardan foydalanish va davlat boshqaruvi samaradorligini oshirish vazifalari oʻzaro bogʻliq holda koʻrib chiqilgan.

Murojaatda 2019–2025-yillarda mamlakatga jalb etilgan toʻgʻridan-toʻgʻri xorijiy investitsiyalarning umumiy hajmi 155,8 milliard dollarni tashkil etgani qayd etilgan. Shu davrda 625 ta sanoat korxonasi ishga tushirilib, taxminan 62 ming ish oʻrni yaratilgan. “Xalq qurilishi” tashabbusini amalga oshirish uchun 2029-yil oxirigacha Milliy fonddan taxminan 6,5 trillion tenge ajratilishi koʻzda tutilgan.

Energetika sohasida taxminan 123 milliard kilovatt-soat elektr energiyasi ishlab chiqarilgani, biroq eng yuqori yuklanish davrlarida tashqaridan quvvat sotib olish ehtiyoji saqlanib qolayotgani taʼkidlangan. “Baqti – Ayagʻoz” temir yoʻl liniyasi 2027-yilda foydalanishga topshirilishi rejalashtirilgan. “Orol – Kaspiy” magistrali esa Trans-Kaspiy koridoridagi yoʻnalishni taxminan ming kilometrga qisqartirishi kerak.