Жезқазғанда 29,6 млрд теңгеге онкология орталығы салынады

Жезқазғанда болашақ онкология орталығының құрылысына капсула салу рәсімі өтті. Жобаның құны 29,6 млрд теңге. Ұлытау облысында 2,5 мыңнан астам адам онкологиялық аурулар бойынша есепте тұр. Жаңа орталық өңірдегі пациенттерді диагностикалау және емдеу мүмкіндіктерін кеңейтуге арналған.

Медициналық кешен облыстық көпбейінді ауруханасының жанында салынады. Ғимараттың ауданы шамамен 22 мың шаршы метр. Стационарда 100 төсек көзделген: 60 онкологиялық, 25 гинекологиялық және 15 паллиативтік. Диагностикалық орталық ауысымына 250 қабылдауға есептелген, жобада сәулелік терапияға арналған сызықтық үдеткіш те бар. Құрылысты 22 айда аяқтау жоспарланған. Денсаулық сақтау министрі Ақмарал Әлназарова мұны өңір тұрғындары үшін ұзақ күткен маңызды оқиға деп атады.

Қазір мамандандырылған көмектің бір бөлігі облыстық ауруханада көрсетіледі. Биыл онкологиялық төсек саны 2,5 есеге ұлғайтылып, 50-ге жеткізілді, бірақ онда сәулелік терапия мен бірқатар операциялар жүргізілмейді. Аурухана директоры Габиден Аханов облыста 25 жыл бойы жеке онкологиялық диспансер болмағанын айтты.