Қырғызстан халыққа сатылатын көмірге ең жоғары бөлшек баға белгіледі

Қырғызстанның Антимонополиялық реттеу қызметі халыққа сатылатын көмірдің ең жоғары бөлшек бағасын белгіледі. Ведомство мәліметінше, шаралар көмірдің бағасы қолжетімді болуын қамтамасыз етуге, әлеуметтік маңызы бар тауардың негізсіз қымбаттауының алдын алуға және бөлшек саудада белгіленген баға шектерінің сақталуына бағытталған.

Көмір бағасын уақытша мемлекеттік реттеу 2027 жылғы 18 қаңтарға дейін, осы күнді қоса алғанда, күшінде болады. Белгіленген ең жоғары бөлшек бағалардың асып кеткені анықталған немесе көмірді сатуға қатысты шағымы мен өтінімі бар азаматтар Мемлекеттік антимонополия қызметінің ыстық желісіне немесе Баткен, Талас, Ош, Шу, Ыстықкөл, Нарын және Жалал-Абад облыстарындағы аумақтық бөлімшелеріне хабарласа алады. Сондай-ақ Ош және Бішкек бойынша бөлімдер де өтініштерді қабылдайды.