Ташкентте табиғи апаттар қаупі мен климаттың өзгеруі талқыланып жатыр

Ташкентте табиғи апаттар қаупін бағалау және климаттың өзгеруіне бейімделу тақырыбындағы халықаралық ғылыми конференция ашылды. Салтанатты ашылу рәсімі Өзбекстан Республикасы Ғылым академиясында өтті. Конференция жаһандық жылынудың, атмосферадағы парниктік газдар мөлшерінің артуы мен климаттың өзгеруінің Орталық Азия өңірінде елеулі экожүйелік мәселелер туғызып отырған кезеңде өтуде.

Құрғақшылық, сел, көшкіндер және су тапшылығы сияқты табиғи апаттардың алдын алу, олардың теріс салдарын бағалау және өңірлік тұрақтылықты қамтамасыз ету басты міндеттер ретінде атап өтілді. Конференцияда шекаралас қауіптермен күресу үшін халықаралық ынтымақтастықты күшейту қажеттігі де айтылды.

Өзбекстан, Ресей, Австрия, Испания, Германия, Қытай, Қазақстан, Қырғызстан, Тәжікстан, Түркия және Пәкістаннан ғалымдар мен мамандар зерттеу нәтижелерін талқылауда. Талқылау бағыттарының арасында математикалық модельдеу, геоақпараттық жүйелер, ерте ескерту жүйелері, топырақтың тозуы, шөлейттену және биологиялық әртүрлілік бар. Конференция 23 қазанға дейін жалғасады, оның қорытындылары саладағы болашақ стратегиялық шешімдер үшін маңызды негіз болады деп күтілуде.