Toshkentda tabiiy ofatlar xavfi va iqlim oʻzgarishi muhokama qilinmoqda

Toshkentda tabiiy ofatlar xavfini baholash va iqlim oʻzgarishiga moslashish mavzusidagi xalqaro ilmiy konferensiya boʻlib oʻtmoqda. Konferensiya Oʻzbekiston Respublikasi Fanlar akademiyasida tantanali ochilish marosimi bilan boshlandi. Anjuman global isish, atmosferadagi issiqxona gazlari miqdorining oshishi va iqlim oʻzgarishlari Markaziy Osiyo mintaqasida jiddiy ekotizim muammolarini keltirib chiqarayotgan bir paytda oʻtkazilmoqda.

Qurgʻoqchilik, sel, koʻchkilar va suv tanqisligi kabi tabiiy ofatlarning oldini olish, ularning salbiy oqibatlarini baholash hamda mintaqaviy barqarorlikni taʼminlash eng dolzarb vazifalar sifatida qayd etilmoqda. Konferensiyada chegaralararo xavflarni bartaraf etish uchun xalqaro hamkorlikni kuchaytirish zarurligi taʼkidlanmoqda.

Oʻzbekiston, Rossiya, Avstriya, Ispaniya, Germaniya, Xitoy, Qozogʻiston, Qirgʻiziston, Tojikiston, Turkiya va Pokistondan olimlar va mutaxassislar tadqiqot natijalarini muhokama qilmoqda. Muhokama yoʻnalishlari orasida matematik modellashtirish, geoaxborot tizimlari, erta ogohlantirish tizimlari, tuproq degradatsiyasi, choʻllanish va biologik xilma-xillik bor. Anjuman 23 oktyabrgacha davom etadi, uning yakunlari soha uchun kelajakdagi strategik qarorlarga muhim poydevor boʻlishi kutilmoqda.