Түркиядағы жұмыссыздық қыркүйекте 8,4%-ға көтерілді

Түркиядағы жұмыссыздық деңгейі қыркүйекте алдыңғы айға қарағанда 0,5 пунктке өсіп, 8,4%-ды құрады. Түркия статистика институты (TÜİK) қыркүйек айына қатысты еңбек нарығы статистикасын жариялады. Мәліметке сәйкес, 15 жас және одан үлкен жастағы жұмыссыздар саны алдыңғы айға қарағанда 198 мың адамға артып, 2 миллион 967 мың адамға жетті. Ал жұмыссыздық деңгейі өткен жылдың дәл осы айымен салыстырғанда 0,1 пунктке төмендеді.

Жынысқа қарай, жұмыссыздық деңгейі ерлерде 6,9%, әйелдерде 11,3% деп бағаланды. 15–24 жас тобындағы жастар арасындағы жұмыссыздық алдыңғы айға қарағанда 1,6 пунктке өсіп, 14,8%-ға жетті. Осы жас тобында ерлер үшін көрсеткіш 10,4%, әйелдер үшін 23,3% болды.

Маусымдық әсерден тазартылған жұмыспен қамту деңгейі 0,1 пунктке төмендеп, 48,3% болды. Сол кезеңде жұмыспен қамтылғандар саны 49 мың адамға азайып, 32 миллион 445 мың адамға түсті. Еңбек күші 149 мың адамға артып, 35 миллион 412 мың адамға жетті. Апталық орташа нақты жұмыс уақыты да 0,1 сағатқа қысқарып, 42,4 сағат болды.