Türkiyədə işsizlik 8,4 faizə yüksəldi

Türkiyədə işsizlik səviyyəsi sentyabr ayında əvvəlki aya nisbətən 0,5 bənd artaraq 8,4 faiz olub. Türkiyə Statistika Kurumu (TÜİK) sentyabr ayına dair əmək statistikasını açıqlayıb. Məlumata görə, 15 və daha yuxarı yaşlı işsizlərin sayı əvvəlki aya nisbətən 198 min artaraq 2 milyon 967 min nəfərə çatıb. İşsizlik səviyyəsi isə keçən ilin eyni ayına görə 0,1 bənd azalıb.

Cinsə görə baxdıqda, işsizlik səviyyəsi kişilərdə 6,9 faiz, qadınlarda isə 11,3 faiz olaraq təxmin edilib. 15-24 yaş qrupunda gənclər arasında işsizlik əvvəlki aya görə 1,6 bənd artaraq 14,8 faiz olub. Bu yaş qrupunda kişilərdə göstərici 10,4 faiz, qadınlarda 23,3 faiz təşkil edib.

Mövsüm təsirindən təmizlənmiş məşğulluq səviyyəsi 0,1 bənd azalaraq 48,3 faiz olub. Eyni dövrdə məşğul şəxslərin sayı 49 min nəfər azalaraq 32 milyon 445 min nəfərə düşüb. Əmək qüvvəsi isə 149 min nəfər artaraq 35 milyon 412 min nəfərə çatıb. Həftəlik orta faktiki iş vaxtı da 0,1 saat azalaraq 42,4 saat olub.