«Жасыл даму» қалдықтарды қайта өңдеуге 122,6 млрд теңге бөлді

Экология және табиғи ресурстар министрлігінің қолдауымен «Жасыл даму» АҚ қалдықтарды басқарудың заманауи инфрақұрылымын дамытуға арналған 34 жобаны қаржыландыруға кәдеге жарату төлемдері есебінен 122,6 млрд теңге бөлді. Бұл туралы Egemen.kz хабарлайды. Министрлік мәліметінше, жобалар жаңа қайта өңдеу өндірістерін салуды, сұрыптау кешендерін құруды және арнайы техника сатып алуды көздейді. Министрлік жанындағы Инвестициялық штаб жалпы қаржыландыру көлемі 440 млрд теңге болатын 67 жобаны мақұлдады, оның ішінде 34 жоба қаржыландырылды.

Қаржыландырылған жобалардың алтауы жылдық жалпы қуаты 650 мың тонна қатты тұрмыстық қалдықтарды сұрыптау нысандарын құруды көздейді. Тағы 18 жоба жылына 435 мың тонна қалдықты қайта өңдеу қуаттарын дамытуға бағытталған, 10 жоба аясында 177 бірлік арнайы техника сатып алу қарастырылған. Бүгінде 15 жоба пайдалануға берілді: 131 бірлік арнайы техника сатып алынып, жылдық жалпы қуаты 290 мың тонна болатын сұрыптау желілері іске қосылды және жылына 19,3 мың тонна қалдықты қайта өңдеуге мүмкіндік беретін өндірістік қуаттар пайдалануға берілді.

Қаржыландырудың ең көп көлемі Алматы қаласындағы, Солтүстік Қазақстан, Павлодар, Ақтөбе және Қостанай облыстарындағы жобаларға бағытталған. Жобалар Атырау, Ақмола, Маңғыстау, Шығыс Қазақстан, Абай облыстарында, Астана мен Шымкент қалаларында және басқа да өңірлерде жүзеге асырылып жатыр. Олар макулатураны, ПЭТ-бөтелкелерді және автошиналарды қайта өңдеуді қамтиды. Осы айдың басында «Жасыл даму» АҚ мен Sparklo Қазақстанда пластик бөтелкелер мен алюминий банкаларды жинауға арналған фандоматтар желісін бірлесіп дамытуға келісті. Тұрғындар осы фандоматтар арқылы 5 миллионнан астам бөтелке мен банка тапсырды.