Qazaxıstanda Yaşıl İnkişaf tullantıların emalına 122,6 milyard tenge ayırdı

Qazaxıstanda Ekologiya və Təbii Ehtiyatlar Nazirliyinin dəstəyilə Yaşıl İnkişaf AC tullantıların idarə edilməsinin müasir infrastrukturunun inkişafına yönəlmiş 34 layihənin maliyyələşdirilməsi üçün utilizasiya ödənişlərindən 122,6 milyard tenge ayırıb. Xəbər Egemen.kz-ə istinadən verilir. Nazirliyin məlumatına görə, layihələr yeni emal istehsalatlarının qurulmasını, çeşidləmə komplekslərinin yaradılmasını və xüsusi texnikanın alınmasını nəzərdə tutur. Nazirliyin nəzdindəki İnvestisiya Qərargahı ümumi maliyyəsi 440 milyard tenge olan 67 layihəni təsdiq edib; onlardan 34-ü maliyyələşdirilib.

Maliyyələşdirilən layihələrdən altısı ildə 650 min ton bərk məişət tullantısının çeşidlənməsi obyektlərinin qurulmasını, 18-i ildə 435 min ton tullantının emal gücünün inkişafını, 10-u isə 177 vahid xüsusi texnikanın alınmasını nəzərdə tutur. 15 layihə istifadəyə verilib: onların çərçivəsində 131 vahid xüsusi texnika alınıb, ildə 290 min ton gücündə çeşidləmə xətləri işə salınıb və ildə 19,3 min ton tullantını emal etməyə imkan verən istehsal gücləri istifadəyə verilib.

Ən çox maliyyə Almatı şəhərində, Şimali Qazaxıstan, Pavlodar, Aktöbe və Qostanay vilayətlərindəki layihələrə istiqamətləndirilib. Layihələr həmçinin Atırau, Akmola, Mangistau, Şərqi Qazaxıstan və Abay vilayətlərində, Astana və Şımkent şəhərlərində həyata keçirilir. Layihələr kağız tullantılarının, PET butulkaların və avtomobil təkərlərinin emalını əhatə edir. Bu ayın əvvəlində Yaşıl İnkişaf AC və Sparklo Qazaxıstanda plastik butulkaların və alüminium qutuların toplanması üçün fandomatlar şəbəkəsini birgə inkişaf etdirmək barədə razılığa gəldiyi bildirilmişdi; bu vasitə ilə sakinlər 5 milyondan çox butulka və qutu təhvil veriblər.