Тоқаев Жолдауы: Халықтық құрылыс бағдарламасы ауқымды өзгерістердің бастауы

Мемлекет басшысы Қасым-Жомарт Тоқаев «Жаңа тарихи кезеңдегі Қазақстанның өзекті міндеттері» атты Жолдауында әлеуметтік-экономикалық даму жоспарлары мен «Халықтық құрылыс» бағдарламасын жариялады. Бағдарлама алтын-валюта резерві мен активтері 130 миллиард доллардан асқан Ұлттық қордан қаржыланады.

Жолдау бойынша инфрақұрылымға 2029 жылдың соңына дейін Ұлттық қордан шамамен 6,5 триллион теңге бөлінеді. Биыл және 2027 жылдың алғашқы екі айында әлеуметтік жобаларға шамамен 1,5 триллион теңге қарастырылады. Өңірлерде шамамен 70 денсаулық сақтау нысаны мен 50-ге жуық білім беру, спорт және мәдениет мекемесін салу жоспарланған.

Көлік саласында «Бақты – Аягөз» теміржолы келесі жылы іске қосылады, тамыз айында басталған «Арал – Каспий» күре жолы Транскаспий дәлізін шамамен 1 мың шақырымға қысқартады деп күтілуде. Президент жақында болған апаттан кейін «Көкшетау – Петропавл» жолын кеңейтуді тапсырды.