Казакстан Дүйнөлүк банктын Metals and Minerals Compact демилгесине кошулду

Казакстан Борбордук Азия өлкөлөрүнүн арасынан биринчи болуп Дүйнөлүк банк тобунун Metals and Minerals Compact демилгесине кошулду. Расмий процедура 16-октябрда Таиландда Дүйнөлүк банк менен Эл аралык валюта фондунун жолугушуулары аясында өттү. Казакстан тарабынан иш-чарага Өнөр жай жана курулуш министрлигине караштуу «Улуттук геологиялык кызмат» АК башкармалыгынын төрагасы Ерлан Галиев катышты. Бул тууралуу primeminister.kz кабарлады.

Compact Казакстандын Өнөр жай жана курулуш министрлиги менен Стратегиялык пландоо жана реформалар агенттиги Дүйнөлүк банк менен биргеликте иштеп чыккан улуттук стратегия болуп саналат. Документ 2026–2030-жылдарга арналган өнөктөштүктүн негизги багыттарын аныктайт. Негизги максат — 2031-жылга чейин тоо-кен металлургия комплексине болжол менен 20 млрд доллар инвестиция тартуу. Кызматташтык үч багыт боюнча ишке ашырылат: мамлекеттик саясат жана жөнгө салуу; геологиялык издөө, инфраструктура жана кадрдык потенциал; минералдык чийки затты казып алуу жана терең кайра иштетүүгө жеке инвестицияларды тартуу.

Өнөр жай жана курулуш министри Ерсайын Нагаспаев Казакстандын жоопкерчиликтүү жана туруктуу өнүгүү принциптерин карманарын айтып, өнөктөштүктүн тармактын атаандаштыкка жөндөмдүүлүгүн арттырарына ишеним билдирди. 2024–2025-жылдары өлкөнүн минералдык-чийки зат базасы 54 жаңы кен орду менен толукталды. 2026-жылдын аягына чейин геологиялык-геофизикалык изилдөөлөр менен камтылган аймакты 2,2 млн чарчы чакырымга жеткирүү пландалууда.