Қазақстан Дүниежүзілік банктің Metals and Minerals Compact жобасына қосылды

Қазақстан Орталық Азия елдері арасында алғаш болып Дүниежүзілік банк тобының Metals and Minerals Compact бастамасына қосылды. Ресми рәсім 16 қазанда Таиландта Дүниежүзілік банк пен Халықаралық валюта қорының кездесулері аясында өтті. Қазақстан тарапынан «Ұлттық геологиялық қызмет» АҚ басқарма төрағасы Ерлан Ғалиев қатысты. Бұл туралы primeminister.kz хабарлайды.

Компакт Өнеркәсіп және құрылыс министрлігі мен Стратегиялық жоспарлау және реформалар агенттігінің Дүниежүзілік банкпен бірлесіп әзірлеген елдік стратегиясы болып табылады. Құжат 2026–2030 жылдарға арналған серіктестіктің негізгі бағыттарын айқындайды. Негізгі мақсат – 2031 жылға дейін тау-кен металлургия кешеніне шамамен 20 млрд доллар инвестиция тарту. Ынтымақтастық үш бағыт бойынша жүзеге асырылады: мемлекеттік саясат пен реттеу; геологиялық барлау, инфрақұрылым және кадрлық әлеует; минералдық шикізатты өндіру мен терең өңдеуге жеке инвестицияларды тарту.

Өнеркәсіп және құрылыс министрі Ерсайын Нағаспаев Қазақстанның жауапкершілікпен әрі тұрақты даму қағидаттарын ұстанатынын айтып, серіктестіктің саланың бәсекеге қабілеттілігін арттыруына үміт білдірді. 2024–2025 жылдары елдің минералдық-шикізат базасына 54 жаңа кен орны қосылды. 2026 жылдың соңына дейін геологиялық-геофизикалық зерттеулермен қамтылатын аумақты 2,2 млн шаршы шақырымға жеткізу жоспарланып отыр.