Өзбекстан эң ири 10 соода өнөктөшүн атады

Өзбекстан 2026-жылдын январь–август айларында дүйнөнүн 200дөн ашык өлкөсү менен соода байланыштарын сактап турду. Улуттук статистика комитетинин маалыматына ылайык, өлкөнүн эң ири соода өнөктөштөрү Кытай, Россия жана Казакстан болду.

Кытай менен Өзбекстандын тышкы соода жүгүртүүсү 13,2 млрд долларга жетти. Россия 9,2 млрд доллар менен экинчи орунду ээледи, Казакстан менен соода көлөмү 3,7 млрд доллар болду.

Биринчи бештикке Түркия (1,9 млрд доллар) жана Ооганстан (1,4 млрд доллар) да кирди. Эң ири он өнөктөштүн тизмесинде Корея Республикасы (1,3 млрд доллар), Франция жана Бириккен Араб Эмирликтери (ар бири 1,2 млрд доллар), Кытайдын атайын административдик району Гонконг (980,1 млн доллар) жана Кыргыз Республикасы (908,4 млн доллар) да бар. Өзбекстандын биринчи сегиз айдагы тышкы соода жүгүртүүсүнүн жалпы көлөмү 57,4 млрд доллар болду.